Musti berbuat bae pa orang.
Sebab biar ley ngana ba sombayang 24 kali dalam satu hari maar di lain pihak ada 25 orang yang ba klak pa Tuhan tentang ngana pe perbuatan da beking susah pa dorang percumalah ngana pe sombayang
Ngana ada atasan, dia mo beking bagus atau dia mo beking jaha, ngana musti
syukuri. Karena ngana akan belajar dari dia tentang buah pengetahuan baik dan buah pengetahuan jahat.
Satu hari kelak ngana akan jadi atasan, ngana so tau mana tu boleh beking deng mana tu nimbole beking pa ngana pe anak buah.
Kalu suka jadi pande buka mata lebar-lebar buka talinga lebar- lebar kong tutu tu mulu. Nanti kalu so pande baru ngana bole buka mulu... itupun cuma bole untuk sesuatu yang berguna for orang laeng.
Ngana musti belajar jadi bijaksana sebab kalu ngana bijaksana ngana bole dapa bedakan mana tu kacang ijo deng mana tu tai idong.
Musti siap jadi gula deng siap juga jadi tali pait, sebab ada waktunya semua kupu-kupu datang batera pa ngana dan ada pula waktunya hele bifi deng lalar so nimau datang ba dekat.
Editor : Clavel Lukas